Orain gerokoak

Egilea: Aimar Zabala

Kalibre handiko proiektuen garapenak denbora tarte aipagarrian luza daitezke. Hori dela eta, oso garrantzitsua da denbora aurrezteko teknikak jakitea eta haiei probetxua ateratzea. Askotan aipatzen dira proiektu bateko nahiz eguneroko bizitzako zereginak ahalik eta modu eraginkorrenean planifikatzeko gomendioak, baina Ikasitako Lezio hau ez doa ildo horretatik. Lezio hau momentu kritikoak identifikatzean eta haiei ahalik eta probetxu handiena ateratzean datza, bukaeran denbora kostu murrizte bat lortzeko xedearekin.

“Gero gerokoak” oso ezaguna den esamolde bat da, bereziki gazteek baliatzen dutena. Hitz hauen bidez esan nahi da kokatzen garen momentuan ez garela arduratu beharrik etorkizuneko kontuetaz. Proiektuen garapenarekin lotuko bagenu, esan genezake epe laburrean amaitu behar diren zereginak dutela lehentasuna, eta etorkizuneko lanei erreparatzeko unea behar den garaian iritsiko dela. Nahiz eta fokua hurbileko eginbeharrei ipintzea ongi dagoen, bestelakoei uko egitea ez da batere praktika ona. Adibide erreal batekin garbiago geratuko da:

 

Demagun bezero batek webgune bat garatzea eskatu digula, eta webgunean lantzen den gaiari buruzko esteken atal bat nahi duela, URL bakoitzaren ezaugarri batzuk azalduz (konplexutasuna, irakurtzeko denboraren estimazioa, laburpena…). Ezer inplementatzen hasi baino lehen, informazio osagarrien esteken zerrenda bat osatu behar genuke, bezeroari bidaltzeko eta honen oniritzia jasotzeko. Noski, esteken hautaketa ez dugu ausaz egingo. Lehenago irakurri eta errebisatu egingo ditugu, egokiak direla ikusteko. Normalean bezeroak egun batzuk beharko ditu gure proposamenari erantzuteko, eta oniritzia jaso ondoren, produktuko atal hori garatzen hasi gintezke. Baina esan bezala, bezeroak webgunean esteken xehetasunak azaltzea nahi du, eta horiek zehaztu ahal izateko, sakontze materialak berriz ere irakurri beharko ditugu.

 

Hortaz, adibide horren bidez ikus daiteke lana errepikatzen ariko ginela, denbora galtze bat suposatuz. Lehenik, hasierako zerrenda proposamena garatu ahal izateko estekak errebisatu behar izan ditugu, baina hortik egun batzuetara, produktuan esteken xehetasunak zehaztu ahal izateko berriz ere begiratu behar dira. Aldiz, URLak lehenengo aldiz errebisatzeko unea baliatu izan bagenu etorkizuneko zereginak betetzeko, denbora aurrezte nabaria suposatuko luke. Hau da, proposamen zerrenda biltzen ari garen bitartean zehaztasun guztiak ere analizatu eta gehitu ditzakegu. Gainera, bigarren ataza egin ahal izateko egun batzuk itxaro ezean, estekak fresko izango ditugu eta lan eraginkorragoa egingo dugu. Horrez gain, adibide konkretu honetan bezeroak ahalik eta xehetasun gehien izatea ere eskertuko luke.

 

Laburbilduz, proiektuak garatzerakoan ez izan kontrolpean soilik gertuko edo epe laburreko eginbeharrak, aztertu ere urrunago geratzen direnak. Beraz, komenigarria da proiektuaren plangintzan horrelakoak identifikatzea eta markatzea. Eta behar den momentuan eta egokiak diren zereginetan, aplikatu hemen proposatzen den esamolde berria: “orain gerokoak”.